‘‘ငါးနာရီထိုးတော့မယ်၊ ခဏနေရင် ကားရောက်တော့မယ်လေ၊ လုပ်စရာရှိတာတွေ ကြိုလုပ်ထားမှ ဖြစ်မယ်ထင်တယ်’’--ဆိုတဲ့ သူငယ်ချင်းရဲ့ အသံက နိုးတစ်ဝက်အိပ်ပျက်ညရဲ့ မှေးစက်ခွင့်ခဏကို ရပ်တန့်လိုက်ပါ တော့တယ်။ အိပ်ချင်မူးတူးဖြစ်နေသော မျက်ဝန်းအစုံကိုနှစ်သိမ့်ရင်း ကိုယ့်ဘ၀ရဲ့ဆိုးတူ ကောင်းဖက်၊ ကိုယ့်အပေါ်အမြဲတမ်း နားလည်ပေးတတ် တဲ့သူလေးကို အသာအယာပွေ့ဖက်ရင်း အဆောင်အောက်ထပ်ကို ဆင်းလာမိပါတော့တယ်။ သူလေးကတော့ ကိုယ်သွားလေရာကိုယ့်နဲ့အမြဲမကွာလိုက်ပါတတ်တဲ့ လက်ပ်တော့ ကွှန်ပျူတာလေးပါပဲ။ အခုလည်း သီရိလင်္ကာနိုင်ငံအနှံ့ဘုရားဖူးသွားမည့် ခရီးစဉ်တွင် သူလေးကကိုယ့်နဲ့ မခွဲမခွါလိုက်ပါနေမြဲပဲလေ။
ကျောင်းဝင်းထဲကဗောဓိပင်အောက်ရောက်တဲ့ခဏမှာ ၁၉-၁၀-၁၁ နေ့ရက်ရဲ့ နံနက်အာရုံအလင်းတန်း ရောင်ခြေလေးတွေ၊ နူးညံ့သိမ်မွေ့လှတဲ့လေပြေအေးလေးတွေက လေးလံထိုင်းမှိုင်းဖြစ်နေတဲ့ စာရေးသူကို လန်းဆန်းသွားစေခဲ့တာတော့အမှန်ပါပဲ။ မနက်ငါးနာရီခန့်တွင် ကားသမားရောက်လာတယ်။ ခရီးသွားရာတွင် လိုအပ်မည့်ပစ္စည်းတွေကားပေါ်တင်ပြီးတဲ့နောက်မှာတော့ စင်္ကာပူနိုင်ငံနှင့်အိန္ဒိယနိုင်ငံ ချန်နိုင်းမြို့က သီရိလင်္ကာ နိုင်ငံသို့ ဘုရားဖူးကြွလာကြတဲ့ဆရာတော်နှစ်ပါးကို ဘုရားဖူးလိုက်ပို့ပေးမည့်ဘုရားဖူးခရီးစဉ်ကို သူငယ်ချင်း နှစ်ပါးနဲ့အတူစတင်လိုက်ကြပါတယ်။
မနက်ငါးနာရီခန့်မို့ ကိုလမ်ဘိုမြို့ကလေးရဲ့ ကားလမ်းတွေက သိပ်ပြီးရှုပ်ထွေး၊ ဆူညံမှုမရှိသေးပါဘူး၊ အေးစက်စက်စိမ်းကားတဲ့မျက်ဝန်းအစုံနဲ့ကြည့်နေဟန်ရှိနေတယ်လို့ထင်ရတဲ့ ကိုလမ်ဘိုမြို့တော်ရဲ့ လမ်းမကြီးရဲ့ တစ်လျှောက် တိုက်ခန်းနဲ့ဆိုင်တန်းလေးတွေ၊ ပြေပြစ်ညီညာလှတဲ့ ကားလမ်းမကြီးတွေက သူတို့ရှေ့မှောက်မှာ တ၀ီဝီပြေးလွှားနေသော ကားလေးနဲ့စာရေးသူတို့ ဘုရားဖူးခရီးသည်သံဃာငါးပါးကို လေးပြေလေအေးလေး တွေနဲ့အတူ တိတ်ဆိတ်ငြိမ်သက်မှု၊ အေးချမ်းသာယာမှုရသတစ်မျိုးကို မျှဝေခံစားခွင့်ပေးနေသလိုပါပဲ။ နံနက်ခင်းအလင်းရောင်စဉ်တန်းတွေကြောင့် စိတ်ထဲမှာပေ့ါပါးမှုတစ်ခုခုကို ထိတွေ့ခံစားခွင့်ရနေတာတော့ အမှန်ပါပဲ။
ဒီတစ်ခေါက်ဘုရားဖူးထွက်တာက တကယ်တော့ ဒုတိယအကြိမ်မြောက်ဘုရားဖူးသွားခြင်းပါပဲ။ ၂၀၁၀ နှစ်ဦးပိုင်မှာကတည်းက သီရိလင်္ကာနိုင်ငံတစ်ဝှန်း ဘုရားဖူးထွက်ကာ သီဟိုနိုင်ငံရဲ့ယဉ်ကျေးမှုအမွေအနှစ် တွေကို ကြိုတင်လေ့လာထားပြီးပါပြီ။ စာရေးသူတို့ ကေလနိယတက္ကသိုလ်မှာလေ့လာသင်ယူရတဲ့ ဘာသာရပ် တွေထဲကတစ်ခုဖြစ်တဲ့ ME 23. Buddhist Art and Architecture-II (Sri Lanka) ဘာသာရပ်အတွက် အထောက်အကူအဖြစ်စေဖို့ မြန်မာစာသင်သားရဟန်းတော်အများစုသည် ကျောင်းမတက်ခင်ကာလမှာ သီဟိုနိုင်ငံဗိသုကာပညာရပ်နဲ့ယဉ်းကျေးမှုအမွေအနှစ်တွေကို ကြိုတင်လေ့လာတဲ့အနေနဲ့ တစ်နိုင်ငံလုံးကို ဘုရားဖူးသွားလေ့ရှိကြပါတယ်။ သူငယ်ချင်းတွေအနဲ့အတူ ခရီးသွားရတယ်ဆိုတာ အရမ်းကိုရင်ခုန်ကြည်နူးစရာ တစ်ခုမဟုတ်ခဲ့ရင်တောင်မှ နှစ်သက်ကြေနပ်စရာတစ်ခုတော့ဖြစ်ခဲ့တယ်ဆိုတာကို အခုတစ်ခေါက်ဘုရားသွားမှ ပြန်လည်ကာပိုမိုအမှတ်ရနေမိသလိုပါပဲ။
ဗုဒ္ဓဘာသာမှာ ဘုရားဖူးသွားတယ်ဆိုတာဟာ အလွန်အရေးပါတဲ့ အခန်းကဏ္ဍတစ်ခုတွင်ပါဝင်ပါတယ်။ မြတ်စွာဘုရားရှင်ကိုယ်တော်တိုင်က ဘုရားရှင်ရဲ့တပည့်သာဝကတွေဟာ ဘ၀မှာ တစ်ကြိမ်တစ်ခါလောက်ပဲ ဖြစ်ဖြစ် ဘုရားရှင်ဖွားတော်မူရာ၊ သဗ္ဗညုတဥာဏ်တော်ကိုရရှိတော်မူရာ (ဘုရားပွင့်တော်မူတဲ့နေရာ)၊ တရားဦး ဟောတော်မူရာနှင့် ပရိနိဗ္ဗာန်ပြုတော်မူတဲ့နေရာများကို သွားရောက်လည်ပတ်ဖူးမြော်သင့်တယ်လို့ ဟောပြခဲ့ တယ်ဆိုတာကို ဒီဃနိကယ်မှာဖော်ပြထားပါတယ်။ ဘုရားဖူးထွက်တာက မိမိရဲ့အသိဥာဏ်ပညာအပေါ်မှာ အခြေပြု၍ စိတ်ဓာတ်ဖွံ့ဖြိုးတိုးတက်မှုအကျိုးကျေးဇူးတွေကို ရရှိနိုင်ပါတယ်။
ဗုဒ္ဓဘာသာအလိုအရဘုရားဖူးထွက်တယ်ဆိုတာက အားလပ်ရက်မှာပျော်ပွဲစားထွက်သလို အပန်းဖြေ သက်သက်တော့မဟုတ်ပါဘူး။ အဲလိုလဲမဖြစ်သင့်ပါဘူးလေ။ ပြဿနာက အခုခေတ်မှာ လူတော်တော်များများ (ဘာသာရေးခေါင်းဆောင်များအပါအ၀င်) ဘုရားဖူးကို အပန်းဖြေခရီးလိုမျိုး ပြောဆိုပြုမူ ဆောင်ရွက်နေကြတာ တွေကိုလည်း ကြားသိတွေ့မြင်ခံစားနေရတာပါပဲ။ မိမိရဲ့အသိအဥာဏ်နဲ့ စိတ်ဓာတ်တို့ ဖွံ့ဖြိုးတိုးတက်မှုတစ်ခုခုကို ရရှိခံစားနိုင်ဖို့အတွက် ကြည်ညိုမြတ်နိုးမှုသဒ္ဓါတရားကိုအခြေပြု၍ အသိဥာဏ်ပညာဖြင့်ချိန်ဆကာ ဘုရားရှင်၏ ဂုဏ်တော်ကိုအာရုံပြုရင်း ဘာသာရေုးဆိုင်ရာနေရာများကို သွားရောက်ဖူးမြော်သင့်ပါတယ်။ ဘုရားရှင်ဖွား၊ပွင့်၊ ဟော၊စံနေရာများကို သွားရောက်ဖူးမြော်ရုံမျှနဲ့တော့ သာမန်ပုဂ္ဂိုလ်တစ်ယောက်ဟာ လူအများပြောနေကြသလို အပါယ်ကလုံးဝလွတ်မယ်ဆိုတာ မဟုတ်မှန်ပါဘူး။
အခုစာရေးသူတို့ကတော့ အပါယ်တံခါးပိတ်ဖို့ ဘုရားဖူးထွက်တာမဟုတ်ကြောင်းကို ရိုးသားစွာဝန်ခံရပါ ဦးမယ်။ ဘုရားဖူးလိုက်ပို့ပေးခြင်းဖြင့်ကုသိုလ်လည်းရ၊ ယဉ်ကျေးမှုအမွေအနှစ်တွေ၊ ဗိသုကာပညာရပ်တွေ ကိုလည်း တက္ကသိုလ်ကလေ့လာသင်ကြားခဲ့ရတဲ့အတိုင်း ရှုထောင့်မျိုးစုံမျိုးကနေပြီးတော့အသစ်တစ်ဖန် ပြန်လည် လေ့လာခံစားဖို့အတွက်ပါပဲဖြစ်ပါတယ်။ ဘုရားရှင်ပွင့်တော်မူခဲ့တဲ့ဗောဓိပင်မှ စိုက်ထူထားခဲ့သော ဗောဓိပင်မြတ်ရယ်၊ ဘုရားရှင်ရဲ့စွယ်တော်မြတ်ရယ်၊ ဘုရားရှင်ကြွတော်မှုခဲ့တဲ့နေရာတွေရယ်၊ ဘုရားရှင်၏ခြေတော်ရာတွေရယ်၊ အရှင်မဟိန္ဒကြွပြီးသာသနာပြုခဲ့သော ကိုးတိုင်းကိုဌာနသာသနာပြု လုပ်ငန်း စဉ်များနဲ့ဆက်စပ်တဲ့နေရာတွေစတဲ့ ဘာသာရေးဆိုင်ရာမြင့်မြတ်သောနေရာများစွာတို့ရှိနေပါတယ်။ ကမ္ဘာမှာ သီရိလင်္ကာနိုင်ငံဟာ အံသြဖွယ် ကောင်းလောက်အောင်ကြီးကျယ်မြင့်မြတ်သောဗုဒ္ဓဘာသာစာပေတွေ၊ ဘာသာရေးယဉ်ကျေးမှုအမွေအနှစ်တွေထွန်းကာရာ နယ်မြေတွေနဲ့ပြည့်ဝသော နိုင်ငံတစ်နိုင်ဖြစ်ပါတယ်။
အခုစာရေးသူတို့ ဘုရားဖူးကားလေးကတော့ဖြင့် ပထမဆုံးခရီးစဉ်အနေဖြင့် ဒမ္ဘူလဘုရား၊ ဒမ္ဘူလတောင်ပေါ်ဆီသို့ ဦးတည်ပြေးလွှားနေပါရဲ့။ ဘု၇ားဖူးပြီးတောင်ပေါ်တက်ရင်းဘာသာရေးအမွေအနှစ် တွေကို လေ့လာနိုင်ဖို့အတွက် အင်အားတွေလိုနေတယ်လေ။ ဒါကြောင့် မနက် ၇ နာရီခန့်မှာ ဆရာတော်တွေ အာရုံဆွမ်းဘုဉ်းပေးဖို့ လမ်းခရီးတစ်လျှောက်မြို့တစ်မြို့မြို့တွင် သင့်လျှော်မည့်စားသောက်ဆိုင်ကိုရှာပြီး ဆွမ်း ကိစ္စစီစဉ်ရဦးမယ်လို့ လွင်ပြင်ကျယ်ကွင်းပြင်လေးတွေဆီကို ငေးမောရင်း စဉ်းစားနေမိပါတော့တယ်။ ။
0 comments:
Post a Comment